Nag-aapoy sa galit ang mga fans at netizens matapos kumalat sa social media ang mga larawan ng pambabastos umano ng ilang empleyado ng isang kilalang bangko sa “standee” ng Asia’s Superstar na si Kathryn Bernardo.

Ang insidente, na naganap umano sa BPI Direct BanKo Moalboal Branch sa Cebu noong February 20, ay agad na nag-viral at umani ng samu’t saring batikos. Sa mga kumalat na larawan, makikita ang dalawang lalaking empleyado na gumagawa ng hindi kanais-nais at malaswang aksyon sa cardboard standee ng aktres, na siyang opisyal na ambassador ng nasabing bangko.

“Kahit Karton, Binabastos Pa Rin”
Ayon sa mga netizens, ang pangyayaring ito ay isang malinaw na patunay na ang pambabastos ay wala sa pananamit kundi nasa utak ng tao. “Perfect example na it’s not about what you wear. Standee na nga lang ‘yan, karton, walang buhay, yet you still found a way to sexualize it,” saad ng isang galit na netizen sa video.

Matatandaang kamakailan lang ay masayang ipinagmalaki ni Kathryn ang kanyang pagiging ambassador ng bangko, kung saan binigyang-diin pa niya ang kahalagahan ng “mutual respect” sa pagitan niya at ng mga brand na nagtitiwala sa kanya.

Pamilya ng Sangkot, Humingi ng Pakiusap
Sa gitna ng tensyon, lumutang ang isang babaeng nagpakilalang kinakasama ng isa sa mga lalaking nasa larawan (kinilalang si “RG”). Ayon sa kanya, “traumatized” na raw ang kanyang partner at hindi nito alam ang gagawin dahil ipinost lang daw ng katrabaho ang larawan nang walang paalam. Humiling din siya na burahin ang mga post at nagbanta ng legal na aksyon sa mga nag-reupload nito.

Panawagan para sa Hustisya
Hindi naman kumbinsido ang publiko sa dahilan ng kampo ng mga sangkot. Marami ang nananawagan sa management ng BPI na maglabas ng opisyal na pahayag at patawan ng kaukulang parusa ang mga empleyadong nambastos sa kanilang sariling endorser.

Sa ngayon, patuloy na inaabangan ng mga fans ni Kathryn Bernardo ang magiging aksyon ng kumpanya hinggil sa “pambababoy” na ito sa imahe ng kanilang idolo.