Si Alphonse Santo Tomas ay isang gwapo, mayamang bilyonaryo, at may-ari ng tanyag na Santo Tomas Lux Hotel. Ngunit sa likod ng kanyang perpektong buhay, may isa siyang malaking sikreto: siya ay isang malalang germophobe. Takot siya sa mikrobyo, palaging may dalang alcohol, at hindi hinahayaang may humawak sa kanya.

Sa kabilang dako, si Vicky, isang masipag na working student at OJT housekeeper sa hotel ni Alphonse. Dahil sa pagmamadali para hindi mahuli sa klase, aksidenteng naitulak ni Vicky ang kanyang trolley at nabangga ang mismong boss na si Alphonse!

Ang masama pa rito, tumapon ang lahat ng basura sa katawan ng bilyonaryo. At ang pinaka-shocking? Isang condom (na nakuha ni Vicky sa basurahan ng ibang kwarto) ang dumikit mismo sa noo ni Alphonse! Sa sobrang gulat, natumba si Vicky sa ibabaw ni Alphonse at naglapat ang kanilang mga labi—isang aksidenteng halik!

Imbes na tanggalin agad sa trabaho, may napansin ang kaibigan ni Alphonse na si Vince. Napagtanto nila na bagama’t nandidiri si Alphonse sa basura, tila hindi siya nakaramdam ng pandidiri nang mahahalikan niya si Vicky. Dito nagsimula ang isang kakaibang kasunduan.

Ang Parusa o Pagkakataon?
Hindi sinisante ni Alphonse si Vicky. Sa halip, ginawa niya itong “personal cleaner” sa kanyang opisina. Ang layunin? Gamitin si Vicky para gamutin ang kanyang trauma sa mikrobyo. Nalaman ni Vicky na ang pagiging germophobe ni Alphonse ay nagmula sa isang malungkot na karanasan noong bata pa ito—nakulong siya sa isang maduming basement ng mall.

Sa bawat araw na magkasama sila, unti-unting naging komportable si Alphonse. Mula sa pagkain sa buffet na kinuha ni Vicky, hanggang sa pagsama sa mga party, natutunan ni Alphonse na muling magtiwala sa mundo sa tulong ng dalaga.

Ang Rebelasyon
Sa huli, nalaman nilang dalawa na si Vicky pala ang batang babaeng nagligtas kay Alphonse sa basement noong mga bata pa sila! Ang tadhana na ang gumawa ng paraan para muli silang magtagpo.

Hindi lang gumaling si Alphonse sa kanyang sakit, kundi nahanap pa niya ang babaeng magpapatibok ng kanyang puso. Mula sa isang “basurang” aksidente, nauwi ang lahat sa isang bonggang kasalan at masayang pamilya.