Hindi na napigilan ang kilig sa ginanap na Media Conference para sa seryeng Deceit (Alibi), matapos magpakawala ng mga makahulugang pahayag ang “Phenomenal Love Team” na sina Kim Chiu at Paulo Avelino tungkol sa tunay na estado ng kanilang relasyon.

Paulo Avelino: “100 ang Score”
Sa gitna ng mainit na katanungan tungkol sa kanilang “real score,” hiningan ng rating ni Alex Calleja si Paulo. Walang pag-aalinlangang sumagot ang aktor: “100 ang score”. Bagama’t nilinaw ni Paulo na “score” lamang ito at hindi direktang pag-amin, hindi magkamayaw ang mga fans sa hirit na ito na tila nagpapatunay sa lalim ng kanilang samahan.

Ang Misteryo ng mga Bulaklak sa Valentine’s Day
Hindi rin nakaligtas si Kim Chiu sa usaping Valentine’s Day. Nang tanungin kung kanino galing ang magandang bouquet ng Peonies na pinost niya, diretsahan itong itinuro ni Kim kay Paulo: “Syempre sa kanya (kay Paulo)”

Dagdag pa ni Kim, ang Peonies ay kanyang paboritong bulaklak, na ayon sa pananaliksik ng media ay sumisimbolo sa “healing and protection.” Nang tanungin kung nararamdaman ba niya ang proteksyon mula kay Paulo, matamis na ngiti ang isinagot ng aktres, habang sinabi naman ni Paulo na natural lang sa kanya ang maging “protective” sa mga taong matagal na niyang nakatrabaho.

Bakit KimPau ang Paborito ng Bayan?
Ito na ang ika-apat na proyekto nina Kim at Paulo nang magkasama (Linlang, Secretary Kim, isang pelikula, at ngayon ay Deceit). Ayon kay Kim, nagpapasalamat siya sa suporta ng mga fans dahil sa panahon ngayon, mabilis magsawa ang mga tao, ngunit ang “KimPau” ay lalo pang lumalakas.

Para naman kay Paulo, ang kanilang tagumpay ay dahil sa tiwala ng mga manonood. Inanunsyo rin ng dalawa na magkakaroon sila ng KimPau World Tour sa US at Canada ngayong darating na Abril at Mayo para personal na pasalamatan ang kanilang mga international supporters.

Ang “Lipstick” Scene na Naging Viral
Binalikan din sa Mediacon ang viral scene kung saan kumalat ang lipstick ni Kim sa labi ni Paulo habang nagte-taping. Ayon kay Kim, hindi ito sinasadya at nagtawanan na lang ang buong crew matapos ang eksena dahil tila nagmukha siyang “clown” sa smudge ng makeup.

Sa ngayon, nananatiling “happy” ang dalawa sa bawat araw na magkasama sila. Gaya ng sabi ni Kim: “Kung ano man ang nagpapasaya sa iyo ngayong taon, i-cherish mo na”.