Hindi nakaligtas sa talas ng bibig ng Unkabogable Star na si Vice Ganda ang kontrobersyal na dating aktor na si Alvin Aragon. Sa episode ng It’s Showtime noong February 19, naging sentro ng katatawanan at “parinig” si Alvin matapos ang kanyang mga viral videos tungkol sa paghihigpit sa asawa at usaping pananamit.

Vice Ganda, “In-amats” ang mga videos ni Alvin
Ayon kay Vice Ganda, hindi niya napigilang panoorin ang mga nag-trending na pahayag ni Alvin sa social media habang siya ay nasa gitna ng traffic. Inamin ng komedyante na talagang pinag-aralan niya ang bawat galaw at pananalita ni Alvin, hanggang sa mga luma nitong videos noong panahon pa ng StarStruck.

“In-enjoy ko kagabi traffic eh. Tawa ako ng tawa tapos sinend ko kung kani-kanino,” ani Vice habang ibinabahagi ang kanyang amusement sa mga pahayag ng asawa ni Izzy Trazona.

Ang Panggagaya at “Solid” na Banat
Hindi lang basta binanggit, kundi ginaya pa ni Vice ang mismong expression at paraan ng pagsasalita ni Alvin sa mga interview nito. Partikular na pinag-tripan ni Vice ang linya ni Alvin tungkol sa pagprotekta sa mga asawa:

“Dapat pinoprotektahan niyo yung mga asawa niyo… kasi bilang mga mister dapat kami lang nakakakita doon,” pag-uulit ni Vice sa pahayag ni Alvin na naging dahilan ng tawanan sa studio.

Sinundan pa ito ng pabirong hirit na: “Lord, paramdam mo naman na mahal mo ako,” na tila sagot sa pagiging “super religious” ng pananaw ni Alvin.

Kim Chiu, “Gumatong” sa Tawanan
Hindi rin nagpahuli ang Chinita Princess na si Kim Chiu. Tawang-tawa si Kim sa mga banat ni Vice at kinumpirma na talagang seryoso ang pag-aaral ng kanyang co-host sa mga video ni Alvin.

“Iba yung amats mo, inamats mo yan kagabi no?” biro ni Kim kay Vice, habang sinasabing nakailang ulit na panonood ang ginawa ng komedyante para makuha ang eksaktong estilo ni Alvin.

Kawalang-Utang na Loob o Entitlement?
Sa huling bahagi ng kanyang segment, nagbigay din ng makahulugang mensahe si Vice tungkol sa pagpapakita ng pasasalamat o gratitude. Binatikos niya ang mga taong tila “entitled” at hindi marunong mag-pasalamat sa mga taong gumagawa ng mabuti sa kanila. Bagama’t walang direktang pangalan, marami ang naniniwala na ang kanyang mensahe tungkol sa “entitlement” ay kaugnay pa rin ng mga isyung kinasasangkutan ni Alvin.

Sa ngayon, nananatiling tahimik si Alvin Aragon at wala pang inilalabas na reaksyon sa ginawang panggagaya at pag-parinig ng mga hosts ng It’s Showtime.